فن الطبقات في الشتاء: أسرار الشياكة والألوان والإكسسوارات

كتبت /رودي نبيل

الشتاء مش بس كوتات وشيلان، ولا موسم برد عادي، ده موسم إبداع وشياكة حقيقية في اللبس. مع شوية ذكاء في اختيار خامات وألوان الطبقات، تقدري تطلعي بأوتفيت مختلف تمامًا من نفس القطع الموجودة عندك بالفعل.

 الألوان هي المفتاح

مهم جدًا ومفصلي في حكاية الـ layering هي الألوان. صحيح إن الشتاء معروف بالألوان الهادئة والدافئة، لكن ده مش معناه إننا نفضل مقيدين فيها. ببساطة، تقدري تلعبي على الألوان الدافئة والمحايدة، زي الأبيض الكريمي مع البيج، لتطلعي بستايل هادي وشيك وأنيق جدًا، شبه الـ old money.

لو بتحبي الاستيلات الكلاسيك، الأسود مع الجراي دايمًا رهان مضمون. ومع موضة الشتاء السنة دي، البرغندي دارج جدًا مع الجراي، اختيار ذكي وجريء وراقي في نفس الوقت.

وفي قاعدة بسيطة لكنها فارقة: خلي الأوتفيت كله لا يتعدى ثلاث درجات ألوان، هتلاقي الشكل منسق ومرتب ومريح للعين من غير مجهود.

 بناء الطبقات بشكل منسق

ابدأي دائمًا بالـ base layer: طبقة خفيفة، مريحة، وناعمة تعطي دفء بطريقة بسيطة من غير ما تضيف حجم، زي basic بسيطة بألوان محايدة أو turtleneck. الطبقة دي هي الأساس اللي كل حاجة هتتبني عليه، وهي اللي ممكن تبوظ أو تظبط الأوتفيت كله.

بعدها تيجي الطبقات الوسطى حسب الرغبة والمشوار والجو والمناسبة، زي قميص فورمال، كارديجان، أو بلوفر خفيف.

وفي الآخر، الـ outer layer، وهي البطلة في الشتاء وبجدارة. الكوت الطويل عملي وراقي جدًا، والجاكيت أو البلزر الفورمال ممكن يتلبس على كلاسيك أو جينز حسب المناسبة. اختاريها بعناية واستثمري فيها فلوس، لأنها أول حاجة بتبان تقريبًا وتحدد روح الأوتفيت كله ومودك.

 اللمسة الأخيرة هي الإكسسوارات

الإكسسوارات مهمة جدًا، ومع ذلك كثير بيستهينوا بيها. شال بلون محايد أو مختلف، حزام يبرز جمال خصرك، شنطة أو جزمة واضحة ستايلها، كلها عناصر ممكن تنقذ أي أوتفيت حاسة إنه ناقص. لو اللبس باهت أو الأوتفيت حاد جدًا، الإكسسوار الصح يرفع اللوك كله في ثانية.

التجربة والجرأة في الشتاء

الشتاء فرصة جميلة للتجربة، جربي، اتجرئي واغلطي، ورجعي وجربي تاني. قوليلي، إيه أكتر ألوان جربتيها وحبيتيها مع بعض وطلعت حلوة فجأة في الشتاء ده؟