مع دخول فصل الشتاء وانخفاض درجات الحرارة، يلاحظ ناس كتير زيادة تدريجية في الوزن، حتى لو ما فيش تغيير واضح في كميات الأكل. الموضوع مش مجرد صدفة، لكنه نتيجة مجموعة من العوامل النفسية والجسدية والسلوكية اللي بتتجمع مع بعض وتخلّي الشتاء موسمًا لزيادة الوزن.
ليه الميزان بيعاند في الشتا؟ 6 أسباب خفية ورا زيادة الوزن
كثرة النوم وقلة النشاط
الشتاء معروف بطوله الليالي وقصر النهار، وده يشجع على النوم لفترات أطول. ورغم إن النوم مهم، إلا إن كثرته أحيانًا بتقلل ساعات الحركة والنشاط اليومي. قلة الحركة معناها حرق سعرات أقل، وبالتالي الجسم بيخزّن طاقة أكتر في صورة دهون.
تغير مستوى الهرمونات
درجات الحرارة المنخفضة بتأثر على بعض الهرمونات المسؤولة عن الشهية والمزاج. في الشتاء، هرمون “الميلاتونين” بيزيد، وده مرتبط بالنوم والشعور بالخمول، في حين إن هرمونات السعادة زي “السيروتونين” بتقل، وده ممكن يخلّي الشخص يميل للأكل أكتر، خاصة الأطعمة الغنية بالسكريات والنشويات.
تناول الطعام للشعور بالدفء
كتير من الناس بيلجأوا للأكل كوسيلة للشعور بالدفء، خصوصًا الأكلات التقيلة والدسمة زي المخبوزات، الحلويات، والمشروبات الساخنة المحلّاة. النوعية دي من الأطعمة بتدي إحساس مؤقت بالراحة، لكنها في نفس الوقت عالية السعرات وبتساهم في زيادة الوزن.
زيادة التوتر والاكتئاب الموسمي
الشتاء بيأثر نفسيًا على بعض الأشخاص، وبيسبب ما يُعرف بالاكتئاب الموسمي. التوتر والحالة المزاجية السيئة غالبًا بتدفع للأكل العاطفي، يعني الأكل بدون جوع حقيقي، لمجرد تحسين المزاج أو الهروب من الضغوط.
قلة الحركة والخروج
الطقس البارد بيخلّي الخروج من البيت أقل، سواء للمشي أو ممارسة الرياضة. الاعتماد على الجلوس لفترات طويلة، سواء قدام التلفزيون أو الموبايل، بيقلل معدل الحرق وبيزود فرص زيادة الوزن.
قلة شرب الماء
في الشتاء الإحساس بالعطش بيقل، وده بيخلّي ناس كتير تشرب مية أقل من احتياجها. قلة شرب الماء بتبطّئ عملية التمثيل الغذائي، وكمان أحيانًا بتخلّي الجسم يخلط بين العطش والجوع، فيدفعنا للأكل بدل الشرب.
عادات بسيطة تفرق وميزان ثابت
زيادة الوزن في الشتاء مش أمر حتمي، لكنها نتيجة عادات ممكن ننتبه لها ونعدّلها. شوية حركة يومية، اختيار أكل أخف، شرب مية بانتظام، والاهتمام بالحالة النفسية، كلها عوامل بتفرق وبتخلّي الشتاء يمر من غير ما يسيب أثره على الميزان.
