كشف صديق مقرب لـ أحد الغطاسين المصريين المتوفين غرقًا في العين السخنة، نتيجة إهمال شركة O2 Diving للغطس، سبب وفاة صديقه، حيث قال: حسن كان من فترة شغال مع شركة الغطس دي، وكان بيشتكي طول الوقت إنهم مبيصرفوش على المعدات والصيانة، وإن الشركة فيها إهمال كبير، وكان نازل إجازة من أسبوعين، وكلمني عن إهمال الشركة اللي شغال فيها، وهي شركة تجارية لأعمال الغطس واللحام تحت الماء، ويوم الواقعة هو كان نازل مع زميله محمد المياه بيلحموا تحت الماء على عمق 6 متر، ودا عمق مش كبير.
سبب وفاة 2 من الغطاسين في العين السخنة
وقال أسامة أكرم، صديق الغطاس المتوفي في العين السخنة حسن عدلي، في تصريحات خاصة حسن طول عمره بيغطس وبيصطاد تحت الماء ببنادق وهو حد متمكن جدًا في الغطس، فبالنسبة إنه يغطس تحت عمق 6 متر أمر سهل له، حتى لو مش معاه أكسجين، ولكن اللي حصل إنه في 2 غطاسين نزلوا قبلهم ظهر عليهم أعراض بسبب تلوث الأكسجين، وكانوا بيشتكوا من المعدات، وكل دا عرفناه من موبيل حسن بعد كدا ومن الكلام اللي كان بيحكيه لشقيقه قبل ما ينزل تحت المياه.
وأضاف أسامة أكرم، صديق الغطاس المتوفي في العين السخنة حسن عدلي، عشان ينزلوا أصلا في مهمة لحام تحت الماء لازم يكون عدد الغطاسين 4، وهما 2 غطاسين ومراقب وقائد، لكن دا حصلش وحسن وزميله بس اللي نزلوا بأمر من الشركة، والوفاة ناتجة عن إهمال الشركة في المعدات، وحتى لما غابوا تحت الماء الشركة معرفتش بغيابهم غير لما الجثامين ظهرت في الماء، وصديقي حسن عدلي ظهر بعد 7 ساعات، ولكن زميله محمد ظهر بعد 24 ساعة، وأهله أصلًا اللي بلغوا بغيابه لأنهم كانوا بيحاولوا يوصلوا له ومش عارفين.
واستكمل أسامة أكرم، صديق الغطاس المتوفى في العين السخنة حسن عدلي، الشركة مبتظهرش في التحقيقات، ودي مش أول مرة تحصل الواقعة دي، وإحنا بنطالب بتسريع إجراءات الطب الشرعي واستخراج تصريح الدفن، عشان نقدر ندفنهم، لإن الوفاة من يوم الأربعاء.
بسبب عدم الصيانه
كشفت أسرة الغطاس محمد نبيل، المتوفى غرقًا في العين السخنة خلال تأدية مهام عمله، تفاصيل وفاته، التي كانت نتيجة إهمال شركة O2 Diving للغطس، في صيانة وتصليح معدات الغطس واستخدام أكسجين ملوث.
وقال سعيد جابر، ابن خالة الغطاس محمد نبيل، في تصريحات خاصة محمد نبيل ابن خالتي أكبر إخواته وهو اللي مسئول عن أسرته بعد وفاة والده، وهو غطاس في شركة O2 Diving للغطس، وشغال في الشركة بشكل دوري ومعاهم من 5 شهور، ومتأمن عليه في الشركة، وطلبوا منه شغل يوم الواقعة والمفروض إنه هيرجع البيت يوم الأربعاء بالليل، وإنه مهمة عمله تحت الماء بتستغرق من نص ساعة لساعة إلا ربع، ومينفعش يطول تحت الماء أكتر من كده، وقبل ما ينزل المياه كان مكلم والدته، ومعرفها إنه راجع البيت بعد الشغل.
وأضاف سعيد جابر، ابن خالة الغطاس محمد نبيل: كان متفق مع والدته في آخر مكالمة بينهم إنهم هيتغدوا مع بعض بعد ما يرجع من الشغل، وعدى ساعة واتنين والدته منتظراه لإن هي عارفه مواعيد شغله، وفي حين أنه اختفى تحت الماء لساعات طويلة إلا إن الشركة أصلًا مكنتش عارفه بغيابه لحد الساعة 7 مساءً يوم الأربعاء، وعرفنا بوفاة محمد من حد اتصل من موبايله على والدته وعرفها بوفاته هو زميله حسن غرقانين.
وتابع: الشركة كانت بتحاول تسكتنا وأول ما وصلنا لـ الميناء في العين السخنة قالولنا ايه اللي جابكم دلوقتي كنتوا خليكوا للصبح، ولما سألنا الشركة قالوا إنهم نزلوا الغواصين أول غطسة يبحثوا عن محمد، وفضلوا يقولوا لنا لسه استنوا لحد ما النهار يطلع عشان الليل دخل علينا، حتى في الوفاة واستخراج الجثة كان في إهمال،
واستكمل: محمد نبيل ابن خالتي والده متوفى وهو اللي كان شايل مسئولية أسرته من صغره بعد وفاة والده، وعيد ميلاده الـ 26 كان في شهر 7 المقبل، هو كبير والدته واخواته كلهم لسه في التعليم، وموبايلات حسن ومحمد عليها فويسات من زميل لهم كان معاهم في نفس الشركة ومشي وسابها من فترة، بيشكوا فيها من المعدات والصيانة بتاعت الشركة والأكسجين اللي في الأسطوانات.
وأردف: كل اللي بنطلبه هو حق محمد نبيل وحسن عدلي، لأن الشركة دي تسببت في الإهمال اللي أدى لوفاتهم، ودي واقعة متكررة لنفس الشركة، وفي عام 2016 حصل نفس الواقعة، واتكررت في عام 2019، ولكن المرادي تكررت مع حسن عدلي ومحمد نبيل، شابين عمرهم صغير مكملوش الـ 30 سنة.